चंद्रयान सरसी छंद

चंद्रयान विषय मा सरसी छंद

चंद्रयान   चन्दा  मा   जाही , भारत   पाही    मान।
नवा नवा  विद्या ला पाके , बड़ही   गाँव   किसान।।

अमेरिका  अउ रूस पहुँच गे , दूर गगन के  छाँव।
हमर  तिरंगा   घलु  लहराही , वो  चन्दा   के गाँव।।

जनता तक सब बात पहुँचही,आही शैक्षिक क्रांति।
मौसम के सन्देशा मिलही , सुन ओ भउजी  शांति।।

सीमा मा  बइठे  जवान मन , शोर  लिहीं  तत्काल।
कम्प्यूटर  मा  देख  जानही , बइरी के  सब चाल।।

देश  तरक्की  के  उदीम हे , चंद्रयान     अभियान।
विनती करथौं येला खच्चित,सफल करय भगवान।।

साधक : विरेन्द्र कुमार साहू

*यान विषय मा "बालकविता" सरसी छंद*

पढ़ लिखके बिग्यानी बनहूँ , यान बनाहूँ एक।
चढ़के ओमा दुनिया घुमहूँ , जाहूँ देश अनेक।।

जाहूँ चन्दा मामा के घर , चढ़के  सुग्घर  यान।
टेस मारके  गाना  गाहूँ , अपन दिखाहूँ  शान।।

लेहूँ  टोपी  चश्मा पनही , कुरता  छिटही  रंग।
लुका-छुपी के खेल खेलहूँ , बादर  भैया संग।।

टोर टोर सब तारा मन ला , रखहूँ अपने जेब।
बेंच बेंच के ओकर बदला , घात बिसाहूँ सेब।।

मामी चंदैनी रोटी ला , दिही  दूध   मा   बोर।
खाहूँ चप्पर - चप्पर  मैंहा , दूनो हाथ चिभोर।।

छंदकार : विरेन्द्र कुमार साहू
        ग्राम बोडराबांधा(पाण्डुका)
   वि.स. राजिम जि. गरियाबंद(छ.ग.)