चलौ पढ़े ला छत्तीसगढ़ी सरसी छंद रचना

सरसी छंद :- चलौ पढ़े ला छत्तीसगढ़ी रचना
चलौ पढ़े ला  शाला    जाबो ,
                  हो  जा   झट    तइयार।
पढ़बो  लिखबो  तभ्भे खुलही ,
                  हमर   भाग    के   द्वार।।

जतन करौ सब पढ़इ लिखइ के ,
                 बुध-बल    होही     पोठ।
मिलथे  सब सुख पढ़े लिखे ले ,
                सोला     आना       गोठ।।

गढ़व   कहानी  अपन सियानी ,
               शिक्षा        गंगा       नीर।
भागीरथ  बन  मिहनत करले ,
              बदल     जही      तकदीर।।

डगर कठिन शिक्षा के लेकिन ,
             हे   जिनगी     सुख    सार।
मिहनत के फल आज नहीं कल,
             मिलही      छप्पर       फार।।

नोनी   ला  घलु   शिक्षा  देवौ ,
             बदलौ        जुन्ना        रीत।
अक्षर  अक्षर   पढ़के   बेटी ,
             जाही       दुनिया       जीत।।

करौ  ज्ञान   रूपी  गहना  ले ,
            बेटी          के         सिंगार।
येहर   आवय  सुग्घर   गहना ,
           जस     हीरा       के      हार।।

जतन  करौ शिक्षा  के बढ़िया ,
           बनके          सारद   -    पूत।
सम्बल होही  मन  मंदिर हा ,
          भागहि     भय     के      भूत।।

                    छंदकार :-
                विरेन्द्र कुमार साहू
        ग्राम  - बोडराबांधा (पाण्डुका)
       वि.स. - राजिम जिला -गरियाबंद
       छत्तीसगढ़ , मो. 9993690899