उमस विषय मा छत्तीसगढ़ी सरसी छंद

आज के विषय "उमस" मा सरसी छंद

बढ़गे  हावे  नंगत  गरमी ,
                     कुहरत  हावे   घात।
कठला देहे  पवन  देवता ,
                    तात-तात दिन - रात।।

आँखी-आँखी चँउधा गेहे ,
                   धमकत   हावे    माथ।
बिकट उमस मा तरसत हावों,
                  नइहे    धीरज     साथ।।

खउलत हावे धरती दाई ,
                 उड़त  चाय अस   भाप।
जम्मों प्रानी भोगत हावे ,
                 जबर   करे  कस   पाप।।

बाप बरोबर गरमी ऋतु के ,
               लागत       हे      आषाढ़।
बितगे पाख तभो ले अभ्भो ,
               आये      नइहे        बाढ़।।

दुख के पाछू सुख हा मिलथे ,
             विधि    के     इही   विधान।
घरी उमस के जब कट जाही ,
              आही       जाड़     मितान।।

छंदकार :-
                विरेन्द्र कुमार साहू
        ग्राम  - बोडराबांधा (पाण्डुका)
       वि.स. - राजिम जिला -गरियाबंद
       छत्तीसगढ़ , मो. 9993690899