नशा उप्पर छंद रचना

नशा नाश के मूल कहाथे , अब्बड़ येह खराब।
रोग लाय टीबी कैंसर अउ , सूगर  बीपी  दाब।।

हर  मौसम बीमारी पावो , खाके गुटखा पान।
करौ खोखला अपने तन ला,पहुँचों झट शमशान।।

हल्ला-गुल्ला करय शराबी ,
                     पीके  घात शराब।
होगे  टीबी  रोगी    पगला ,
                    देदिस नशा जवाब।।

फँसके दारू चक्कर काका ,
                  तन बर नइ दिस ध्यान।
नशा नाश कर डारिस उनखर ,
                   पहुँचिस उन  शमशान।।

एक बाप के अड़बड़ लइका ,
                  कलर-कलर घर-द्वार।
काम-बुता  कुछु होय नहीं जी ,
                 हल्ला - गुल्ला    सार।।
4.
हल्ला-गुल्ला  माँचे  हाबे ,
                  रोवत  सकल  जहान।
कोन्हों रोवत रोटी खातिर ,
                    कोन्हों बसन मकान।।

विरेन्द्र कुमार साहू बोडराबांधा राजिम