बत्तर छत्तीसगढ़ी छंद रचना

बतर बिषय मा सरसी छंद

हरियर-हरियर उलहा पाना ,
                          बरसा ऋतु जब आय।
पड़े  बतर  पानी  धरती मा ,
                          महर - महर  ममहाय।।

काखर खेती पटपर भाँठा ,
                         काखर  हा  गद  खार।
तोला  सबके  आस  पुरोना ,
                         बादर     सुन    गोहार।।

गरजत   घुमड़त  आबे बादर ,
                        बोंना      हाबे      धान।
आय बतर दिन जोहत हाबे ,
                        रद्दा     तोर     किसान।।

नाँगर बइला जोर चले अउ ,
                     अरिहा     लउठी      हाथ।
अरा-तता  के गीत सुनावय ,
                      राग    ददरिया        साथ।।

झूम झमाझम बरसे बदरा ,
                    बोंये        धनहा        धान।
घात फसल लहराही कहिके ,
                    नाचत       हवै      किसान।।

छंदकार :-
विरेन्द्र कुमार साहू
ग्राम  - बोडराबांधा (पाण्डुका)
वि.स. - राजिम जिला -गरियाबंद
छत्तीसगढ़ , मो. 9993690899