योग उप्पर छत्तीसगढ़ी रचना सरसी छंद

तन हा रइही चंगा! तभे लान सकबे गंगा।।
"योग करौ" "सरसी - छंद"

उठके बिहना योग करव जी ,
                       मिटही कष्ट अपार।
तन अउ मन हर चंगा रइही ,
                      धमके नहीं  अजार।।

आनी - बानी   योगा  आसन ,
                     करहू      प्राणायाम।
अबड़  लाभ  देवैया  येहर ,
                     सुख के  आवै  धाम।।

जिनगी हाँसत पोहाना हे ,
                     रोजे कर  तँय  योग।
तन-मन-धन ले मंडल रहिके,
                    सुख जीवन के भोग।।

खाय करौ सादा भोजन अउ ,
                    करे  करौ  जी  योग।
नइ झपाय जी कभू बिमारी ,
                       तन हर रही निरोग।।

योग ल सुग्घर जिनगी खातिर ,
                     जानौ   सरल  उपाय।
अपनावौ जम्मोंझन  येला ,
                    बिना   समय   पोहाय।।

सबले सुग्घर धन कलयुग मा,
                  काया   स्वस्थ्य   निरोग।
करौ  येल  सन्जोए  बर  जी  ,
                 बिहना      बेरा      योग।।

योग  कहूं  दिनचर्या   बनगे ,
                 बदल    जही      तकदीर।
साधक ला सब साधन मिलही,
                कहत  हवय   कवि   वीर।।

पालन करिहौ अन्तर्मन ले ,
                 सुग्घर .  योग      विधान।
बने रही जी हाँसत-खेलत ,
                  जिनगी    हर   गतिमान।।

धरती के रक्षा जस करथे ,
                  वैदिक     यज्ञ   विधान।
जानौ तस तन रक्षा खातिर ,
                  योग   ल   यज्ञ   महान।।

नियम सहित जब करिहौ योगा,
                   आही    कला  म धार।
मिलही  रोजी - रोटी तुमला ,
                    सँग  मा  मान  अपार।।
छंदकार :-
विरेन्द्र कुमार साहू
ग्राम  - बोडराबांधा (पाण्डुका)
वि.स. - राजिम जिला -गरियाबंद
छत्तीसगढ़ , मो. 9993690899